Kosova hyn në javën vendimtare para zgjedhjeve të jashtëzakonshme parlamentare të 28 dhjetorit, pas një viti bllokadash institucionale që e kanë lënë vendin pa kuvend funksional dhe me hapësirë fiskale të ngushtë. Sipas vlerësimeve të raportuara nga Reuters, ngërçi i zgjatur ka vonuar ratifikimin e huave dhe programeve të mbështetjes, duke krijuar një boshllëk financiar që po i kushton shtrenjtë sektorëve bazikë.
Në qendër të debatit janë fondet e mëdha që presin “dritën jeshile” të ligjvënësve. Reuters raporton se rreth 880 milionë euro fonde nga Bashkimi Evropian për buxhetin e Kosovës janë shtyrë, ndërsa 127 milionë euro mbështetje nga Banka Botërore mbeten në pritje, me disa afate që rrezikojnë të skadojnë në fillim të vitit 2026. Po sipas Reuters, BE-ja ka paralajmëruar heqjen e masave që i kishte vendosur Kosovës në vitin 2023, pasi pas zgjedhjeve lokale të tetorit u inauguruan kryetarë serbë në komunat veriore.
Kryeministri në detyrë, Albin Kurti, kërkon mandat të tretë, ndërsa opozita e akuzon për thellim të tensioneve në veri dhe përkeqësim të imazhit ndërkombëtar të vendit. Analistë lokalë paralajmërojnë se pa një shumicë të qartë, skenari i bllokadës mund të përsëritet, pikërisht kur Kosova duhet të nisë edhe proceset kushtetuese për zgjedhjen e presidentit në muajt në vijim.
Në Prishtinë, atmosfera elektorale shoqërohet me pritjen e partnerëve ndërkombëtarë që institucionet e reja të formohen sa më shpejt, në mënyrë që të mos humben programet e financimit dhe reformat e ngecura. Burimi: Reuters./lajmishqip.net