Në një takim të rëndësishëm me Presidenten e Komisionit Evropian, Ursula von der Leyen, Kryeministri Albin Kurti ka përsëritur kërkesën thelbësore të Kosovës: dorëzimin sa më të shpejtë të pyetësorit për anëtarësim dhe dhënien e statusit të vendit kandidat. Duke shprehur mirënjohjen për mbështetjen e vazhdueshme, Kurti theksoi urgjencën e avancimit të vendit në rrugën e tij evropiane.
Në fokus të bisedimeve ishte thellimi i marrëdhënieve mes Kosovës dhe Bashkimit Evropian, ku u theksua progresi i arritur në sundimin e ligjit, siguri, zhvillim demokratik dhe rritje ekonomike. Në këtë kontekst, Kryeministri informoi Presidenten von der Leyen mbi procesin zgjedhor lokal, duke e cilësuar atë si të lirë dhe në përputhje me standardet më të mira evropiane, dhe garantoi një tranzicion të rregullt të pushtetit.
Si një hap konkret për forcimin e bashkëpunimit ekonomik, Kryeministri Kurti i dorëzoi personalisht Presidentes von der Leyen tri letra zyrtare. Përmes tyre, Kosova shpreh interesin për të nisur dialogë strategjikë në kuadër të iniciativës “Single Market Highway” në tre sektorë kyç ku sheh potencial të lartë: bujqësi, teknologji të informacionit dhe komunikimit (TIK), si dhe industri të mbrojtjes.
Kjo kërkesë vjen tre vjet pasi Kosova aplikoi zyrtarisht për anëtarësim në BE. Ndonëse Brukseli, duke iu referuar Nenit 49 të Traktatit të BE-së, ka konfirmuar mbështetjen për perspektivën evropiane të vendit, Kosova mbetet e fundit në procesin e integrimit mes shteteve të Ballkanit Perëndimor./lajmishqip.net
