Universiteti i Prishtinës “Hasan Prishtina” po përballet me një rënie të theksuar të interesimit nga ana e maturantëve. Për 5,723 vende të lira të shpallura në konkursin e parë, kanë aplikuar vetëm 3,398 kandidatë. Këtë e ka konfirmuar prorektorja për Zhvillim Institucional, Cilësi dhe Çështje Studentore, Majlinda Gjelaj, e cila ka paralajmëruar se do të bëhen analiza për të përshtatur programet me nevojat e tregut të punës.
Sipas prorektores Gjelaj, ky trend është i ngjashëm me atë në Evropë dhe botë, ku vërehet një zhvendosje e interesit të të rinjve. Ajo shpjegoi se ka një rënie të dukshme në degët tradicionale si Juridiku, Ekonomiku apo Edukimi, të cilat dikur kishin një numër enorm të aplikantëve.
Në anën tjetër, interesimi ka marrë hov në shkencat tekniko-teknologjike dhe ato mjekësore. Kjo reflekton një dëshirë të të rinjve për profesione që ofrojnë kualifikim dhe dalje më të shpejtë në tregun e punës.
Diferenca është e qartë në shifrat e aplikimeve: dega e Inxhinierisë Kompjuterike ka pranuar 500 aplikime për 250 vende, ndërsa Mjekësia e Përgjithshme ka 1,000 kandidatë për vetëm 200 vende. Në kontrast, në degën e Fizikës për 80 vende kanë aplikuar vetëm 20 kandidatë, në Kimi 15 aplikantë për 60 vende, dhe në Biologji 36 aplikantë për 45 vende.
Zyrtarët e UP-së shpresojnë se një pjesë e vendeve të paplotësuara mund të plotësohen në afatin e dytë të konkursit, raporton lajmishqip.
