Rrugët e Uashingtonit po mbushen me tanke, artileri të rëndë dhe automjete të blinduara. Shtetet e Bashkuara po bëhen gati për një nga paradat më madhështore ushtarake në historinë e tyre moderne, një shfaqje force me një kosto që pritet të arrijë deri në 92 milionë dollarë.
Zyrtarisht, parada që do të mbahet më 14 qershor shënon 250-vjetorin e themelimit të Ushtrisë Amerikane. Megjithatë, data nuk është aspak e rastësishme – ajo përkon saktësisht me ditëlindjen e Presidentit Donald Trump, duke ndezur një debat të ashpër nëse ngjarja është një nderim për forcat e armatosura apo një festë e personalizuar për presidentin.
https://x.com/nexta_tv/status/1931722283954893048
Për këtë ngjarje, drejt kryeqytetit po transportohen sisteme moderne howitzer, tanke dhe një arsenal i gjerë armatimesh të rënda, me qëllim shfaqjen e fuqisë 250-vjeçare të ushtrisë.
Kjo shifër marramendëse ka ngritur diskutime të shumta në SHBA, në një kohë tensionesh ndërkombëtare. Mbështetësit e shohin si një mundësi të merituar për të nderuar sakrificën e ushtarëve amerikanë. Nga ana tjetër, kritikët e quajnë një shfaqje force të panevojshme, duke akuzuar se po përdoret për qëllime politike, veçanërisht duke pasur parasysh dëshirën e njohur të Trumpit për parada ushtarake madhështore.
