Kryeministri i Kosovës, Albin Kurti, në postimin e tij të fundit në Facebook, ka nderuar sakrificën e heronjve Fehmi Lladrovci dhe Xhevë Krasniqi-Lladrovci, në përvjetorin e 26-të të rënies së tyre. Ai e përshkroi jetën dhe veprën e tyre si një simbol të pastër të dashurisë për lirinë e Kosovës, duke thënë se “jeta e tyre ishte lavd për dashurinë dhe lirinë e Kosovës.”
Kurti solli në vëmendje se çifti, të rënë në betejë më 22 shtator 1998, jetuan dhe vdiqën për të njëjtin ideal – pavarësinë e Kosovës. Ai ndau gjithashtu një letër prekëse të shkruar nga Fehmiu për Xhevën nga burgu, ku ai e përshkruan Xhevën si “Drita e syrit tim.” Me fjalë të thjeshta, por plot ndjenjë, Fehmiu shprehu dashurinë e tij të pashuar për bashkëshorten dhe lirinë për të cilën luftonin të dy.
Postimi i Kurtit përfshinte edhe homazhe për bashkëluftëtarët Fatime Hetemi dhe Shefqet Zeka, të cilët ranë dëshmorë të së njëjtës betejë. Kurti veçoi edhe një letër të shkruar nga Shefqet Zeka, ku ai shpreh guximin e tij dhe dëshirën për lirinë, duke thënë se “Liria dhe Pavarësia janë më të shtrenjta se jeta.”
Ky postim ka frymëzuar një valë reagimesh pozitive dhe falënderime nga qytetarët, duke rikthyer në qendër të vëmendjes sakrificën sublime të dëshmorëve për pavarësinë e Kosovës.
