Pas dënimit të Pjetër Shalës me 18 vjet burgim nga Gjykata Speciale, ka reaguar deputeti i PDK-së, Ardian Kastrati.
Në platformën Facebook, tha se në Kosovë duhet të ketë protesta masive.
Po ashtu, sipas tij, duhet të ketë edhe reagim institucional për ta mbrojtur UÇK-në.
“Nga shtatori sheshet duhet t’i bëjmë ZI nga protestat, kurse nga tash çdo gur duhet lëvizur në rrafshin institucional, politik e diplomatik në mbrojtje të historisë së lavdishme të UÇK-së”, tha ai.
Sipas tij, nëse nuk ka reagime, kjo do të kuptohet si aprovim i padrejtësisë.
“Përndryshe, mosreagimi jonë do të kuptohet si aprovim për ata që po duan ta ndërtojnë një të vërtetë të re historike ku UÇK-ja paraqitet si ndërrmarrje kriminale, ndërsa nuk flitet për 13.000 shqiptarë të vrarë e 20.000 shqiptare të dhunuara nga Serbia!”, u shpreh ai.
Nëse Gjykata Speciale vazhdon me dënime të larta, sipas Kastratit ka gjasa të kalohen edhe statistikat e gjykatave jugosllave e serbe që i dënuan mijëra shqiptarë.
“Me këtë ritëm dhe me këto dënime drakonike kjo gjykatë ka gjasa t’i kalojë edhe statistikat e gjykatave jugosllave e serbe që dënuan mijëra shqiptarë nëpër dekada!”, u shpreh ai.
“Përjetësisht me UÇK-në!”, përfundoi Kastrati.