Hetimet mbi sulmin e armatosur në Shkodër, që la pas dy të vrarë dhe dy të plagosur, kanë zbardhur një skenar të mirëfilltë vrasjeje me pagesë. I dyshuari kryesor, Ragip Gila, nuk ka vepruar për motive personale, siç pretendoi fillimisht, por ishte kontraktuar nga një grup kriminal me objektiv eliminimin e Erogen Vaso Brajoviçit, i cili mbeti i plagosur.
Ngjarja ndodhi mëngjesin e së hënës, kur Gila hyri në një lokal dhe hapi zjarr drejt tavolinës ku ndodhej Brajoviç. Si pasojë, humbën jetën Armando Pali dhe Lirodon Kraja, ndërsa u plagosën objektivi i sulmit dhe kamarierja e lokalit.
Pas një operacioni të gjerë, policia arrestoi Gilën pranë shtratit të lumit Kir. Gjatë ndalimit, atij iu sekuestruan një automatik, një pistoletë, jelek antiplumb, maskë dhe një shishe me lëndë djegëse, e cila dyshohet se do të përdorej për të asgjësuar provat. Ndaj tij rëndojnë akuzat e vrasjes në rrethana cilësuese, vjedhjes me armë dhe armëmbajtjes pa leje.
Paralelisht, hetimet zbuluan dy baza armatimi dhe çuan në shpalljen në kërkim të dy bashkëpunëtorëve të Gilës: Barush Bregu (alias Bajram) dhe një 17-vjeçar. Në banesat e tyre u gjet një arsenal i vërtetë, përfshirë shtatë armë zjarri, municion luftarak dhe kapsolla detonatore.
Në kuadër të zgjerimit të hetimeve, forcat e rendit kanë ushtruar kontrolle në disa baza të dyshuara në Shkodër, përfshirë prona të lidhura me fisin Lici. Në një prej banesave me qira u zbuluan një tjetër arsenal: një automatik, 6 pistoleta, municione, 45 kapsolla detonatore, 5 dronë me pajisjet përkatëse dhe një automjet “Audi” me targa të vjedhura.
Aktualisht, të gjitha armët e sekuestruara janë dërguar në laboratorin kriminalistik për të përcaktuar nëse janë përdorur në ngjarje të tjera kriminale, ndërsa operacioni vijon për zbardhjen e plotë të rrjetit kriminal pas këtij sulmi./lajmishqip.net