Presidentja e Republikës së Kosovës, Vjosa Osmani, ka deklaruar se për popullin e Iranit tashmë ka mbërritur çasti i lirisë. Sipas saj, ky zhvillim historik vjen si rezultat i drejtpërdrejtë i lidershipit të palëkundur të Shteteve të Bashkuara dhe vizionit të presidentit amerikan, Donald Trump.
Përmes një komunikimi zyrtar në platformën sociale X, e para e shtetit kosovar ka shprehur përkrahjen e saj të plotë për operacionet ushtarake të ndërmarra nga SHBA-ja kundër Iranit. Ky reagim konfirmon rreshtimin strategjik të Kosovës krah aleatëve të saj kryesorë.
“Si gjithmonë, Republika e Kosovës qëndron e palëkundur përkrah Shteteve të Bashkuara dhe partnerëve të saj në mbrojtjen e vlerave universale të lirisë, paqes, sigurisë dhe stabilitetit global,” theksoi Osmani në mesazhin e saj.
Krahas mbështetjes për aksionin amerikan, Presidentja ka dënuar me ashpërsi sulmet e ndërmarra nga regjimi iranian në rajonin e Lindjes së Mesme. Ajo nënvizoi se këto veprime cenojnë rëndë sigurinë e aleatëve tanë strategjikë.
“Ne dënojmë fuqimisht agresionin e regjimit iranian kundër partnerëve tanë. Do të vijojmë të mbështesim çdo masë të ndërmarrë nga SHBA-ja për t’i dhënë fund këtij regjimi dhe për t’i hapur rrugën lirisë dhe paqes,” përfundoi Presidentja Osmani. . /lajmishqip.net