Policia e Kosovës, pas informacioneve të pranuara nga AKI-ja, ka gjetur dhe sekuestruar një sasi armatimi në veri të Mitrovicës, i cili ishte fshehur nga ish-pjesëtarët e grupit terrorist që kryen sulmin në Banjska më 24 shtator të vitit të kaluar.
Veton Elshani, ushtrues detyre i drejtorit të policisë për rajonin e veriut, gjatë një konference për media ku janë ekspozuar armët e gjetura dhe të konfiskuara, ka bërë të ditur se armatimi dhe pajisjet tjera të gjetura dyshohet se kanë qenë aty për një kohë të gjatë.
Ai ka thënë se dy të dyshuarit për rastin e Banjskës, Zharko Cvetkoviq dhe Marijan Radojeviq, e që ndërlidhen me ngjarjen, janë në kërkim.
“Sot në orët e pasdites, Policia e Kosovës pas informacioneve që kishte pranuar nga AKI-ja dhe qytetarët e këtij vendi, kemi vepruar dhe bastisur dy lokacione. Në fakt, katër vende kemi bastisur, por dy lokacione kanë qenë të ndara. Lokacioni i parë, afër ‘Tre rrokaqiejve’ në një pusetë janë gjetur çanta me kallashnikovë dhe fishekë e pajisje, të cilat ju i shihni, në lokacionin e dytë janë pajisje që janë gjetur në një shtëpi dhe në oborr të asaj shtëpie”.
“Që të dyja lokacionet kanë emra, lokacioni i parë lidhet me emrin Marijan Radojeviq, ndërsa lokacioni i dytë ndërlidhet me Zharko Cvetkoviq… dhe që të dytë janë në kërkim për rastin e Banjskës… Ne konsiderojmë se ky armatim dhe këto pajisje ndodhen aty për një kohë më të gjatë”, ka thënë Elshani.
Në sulmin terrorist në Banjska, për të cilin përgjegjësinë e mori krimineli Milan Radoiçiq, kishte mbetur i vrarë rreshteri i policisë së Kosovës Afrim Bunjaku. Interpoli ka vënë në kërkim Milan Radoiçiq, i cili vazhdon të qëndrojë i lirë në Serbi.
