Zelensky refuzon ofertën e administratës Trump për burimet minerale të Ukrainës
Gjatë një takimi me dyer të mbyllura, presidenti i Ukrainës, Volodymyr Zelensky, ka refuzuar ofertën e administratës Trump për t’i kaluar Shteteve të Bashkuara gjysmën e burimeve minerale të vendit, në këmbim të mbështetjes amerikane.
Sipas New York Times, pesë persona të informuar mbi këtë propozim ose me njohuri të drejtpërdrejta për bisedimet kanë konfirmuar lajmin. Sipas dy zyrtarëve evropianë, marrëveshja do t’u garantonte Shteteve të Bashkuara një interes prej 50% në burimet minerale të Ukrainës, duke përfshirë grafitin, litiumin dhe uraniumin.
Megjithatë, mbetet e paqartë nëse ky propozim kishte për qëllim kompensimin për mbështetjen e mëparshme amerikane ndaj Ukrainës në përballjen me agresionin rus, apo nëse lidhej me ndihmën e ardhshme ushtarake dhe financiare.
Të dielën, këshilltari i sigurisë kombëtare i SHBA, Mike Waltz, theksoi se të paktën pjesërisht, kërkesa lidhej me ndihmën e dhënë më parë nga SHBA. “Populli amerikan meriton të ketë një lloj shpagimi për miliardat që ka investuar në këtë luftë,” u shpreh ai. “Mendoj se do të ishte një lëvizje e mençur nga Zelensky që të hynte në këtë marrëveshje me Shtetet e Bashkuara,” shtoi ai.
Ukraina ka rezerva të mëdha të mineraleve të rralla, të cilat e bëjnë atë një furnizues strategjik për Perëndimin. Miniera Zavallivsky në Ukrainën qendrore përmban një nga depozitat më të mëdha të grafitit në Evropë, një material thelbësor për bateritë e automjeteve elektrike dhe reaktorët bërthamorë. Për këtë arsye, Shtetet e Bashkuara po kërkojnë të zvogëlojnë varësinë nga Kina duke siguruar burime alternative të mineraleve strategjike.