Zjarri tragjik që përfshiu një bar në një resort skish në Zvicër dyshohet se u shkaktua nga mjetet piroteknike festive të vendosura mbi shishet e shampanjës, të cilat u afruan rrezikshëm me tavanin, konfirmojnë zyrtarisht autoritetet.
Kryeprokurorja Beatrice Pilloud, në një deklaratë për mediat, bëri të ditur se disa prej hipotezave kryesore të hetimit tashmë janë vërtetuar. “Në këtë fazë procedurale, të gjitha provat tregojnë se zjarri ka origjinën nga fishekzjarret ose flakadanët e vendosur në shishet e shampanjës. Kontaktet e tyre tepër të afërta me tavanin provokuan një zjarr të fuqishëm, i cili u përhap në të gjithë ambientin brenda pak sekondave,” u shpreh ajo.
Flakët morën përmasa të menjëhershme, me gjasë të favorizuara nga prania e materialeve sintetike izoluese që mbulonin tavanin e ulët të sallës. Ndërkohë, oficerët e mjekësisë ligjore po vijojnë punën në vendngjarje, mes raportimeve tronditëse se shumë pacientë, disa prej të cilëve vetëm 15 vjeç, po trajtohen për djegie të rënda të shkallës së tretë. /lajmishqip.net