Lëvizja Vetëvendosje ka formalizuar kandidaturën e Albin Kurtit për kryeministër të ardhshëm të Kosovës. Gjatë Mbledhjes së 59-të të Këshillit të Përgjithshëm të mbajtur të dielën, Kurti mori një votë unanime si mandatar për formimin e qeverisë së re, e njohur si ‘Qeveria Kurti 3’.
Propozimi zyrtar u bë nga nënkryetari Glauk Konjufca, i cili theksoi legjitimitetin për formimin e institucioneve të reja. “Ne kemi Kuvendin dhe do ta bëjmë Qeverinë. Më lejoni ta propozoj për kryeministër kryetarin e LVV-së, Albin Kurti,” deklaroi ai para anëtarëve të Këshillit.
Menjëherë pas propozimit, votimi unanim i anëtarëve konfirmoi Kurtin si propozimin e vetëm dhe të përbashkët të partisë për postin e shefit të ekzekutivit.
Pas këtij vendimi të brendshëm partiak, hapi i radhës është institucional. Emri i Albin Kurtit do t’i dërgohet zyrtarisht Presidentes së Kosovës, Vjosa Osmani, e cila nis procedurat kushtetuese për emërimin e mandatarit.
Sipas Kushtetutës së Kosovës, pas emërimit nga Presidentja, mandatari ka një afat prej 15 ditësh për të paraqitur kabinetin qeveritar para Kuvendit dhe për të kërkuar votëbesimin. Qeveria konsiderohet e zgjedhur nëse siguron shumicën e votave të të gjithë deputetëve. Në rast se propozimi i parë dështon, Kushtetuta lejon një përpjekje të dytë me një kandidat tjetër brenda 10 ditësh. Nëse edhe kjo tentativë dështon, vendi shkon në zgjedhje të parakohshme./lajmishqip.net
