Në mbledhjen e saj të dytë, Qeveria e Kosovës ka marrë vendim për themelimin e Këshillit Shtetëror për shënimin e 28-vjetorit të Epopesë së Ushtrisë Çlirimtare të Kosovës (UÇK).
Kryesimi i këtij këshilli i është besuar ministrit të Mbrojtjes, Ejup Maqedonci, ndërsa në rolin e bashkëkryesuesit do të jetë ministri për Familjen dhe Vlerat e Luftës Çlirimtare. Një detaj që ka tërhequr vëmendjen është vendimi i kryeministrit Albin Kurti për të përfshirë si anëtar të këtij këshilli edhe kryetarin e Skenderajt, Sami Lushtaku.
Përbërja e këshillit plotësohet nga zyrtarë të lartë shtetërorë, përfshirë ministren e Kulturës dhe Turizmit, Saranda Bugujevci, ministrin e Administrimit të Pushtetit Lokal, Elbert Krasniqi, komandantin e FSK-së, Bashkim Jashari, drejtorin e Policisë, Gazmend Hoxha, si dhe përfaqësues nga Organizatat e Dala nga Lufta e UÇK-së. Ekzekutivi ka kërkuar gjithashtu që nga një përfaqësues të dërgojnë edhe Presidenca, Kuvendi, Zyra e Kryeministrit dhe Asociacioni i Komunave.