Temperaturat e larta kanë mbuluar territorin e Kosovës, duke nxitur autoritetet të bëjnë thirrje për kujdes të veçantë dhe shmangie të ekspozimit të panevojshëm në diell.
Sipas Institutit Hidrometeorologjik të Kosovës (IHMK), vendi aktualisht po kalon një valë të nxehti ekstrem, me temperatura maksimale që parashikohet të arrijnë deri në 38 gradë Celsius.
Këto kushte meteorologjike cilësohen si jashtëzakonisht të rrezikshme, sidomos nëse ato vazhdojnë për disa ditë rresht, raporton lajmishqip.
Në përgjigje të kësaj situate, Drejtoria për Siguri dhe Emergjenca në Prishtinë u ka bërë thirrje qytetarëve për vigjilencë maksimale për shkak të temperaturave që pritet të arrijnë 38 gradë Celsius.
Në apelin e saj, drejtoria thekson se alarmi i kuq nga Instituti Hidrometeorologjik tregon për kushte moti tejet të rrezikshme, ku jeta e njerëzve (veçanërisht e të sëmurëve kronikë dhe personave nën terapi) dhe e kafshëve është e rrezikuar. Gjithashtu, parashikohen vështirësi në furnizim me ujë dhe energji elektrike, probleme në trafik, si dhe një rrezik i lartë për zjarre në pyje dhe hapësira të tjera, raporton lajmishqip.
