Presidenti i SHBA-së, Donald Trump, ka ripërsëritur ambiciet e tij për kontrollin amerikan mbi Grenlandën, duke argumentuar se kjo është një çështje thelbësore për sigurinë kombëtare dhe ndërkombëtare.
“Ne kemi shumë nevojë për Grenlandën nga pikëpamja e sigurisë kombëtare dhe sigurisë ndërkombëtare. Duhet të bëjmë diçka me Grenlandën”, u shpreh Trump gjatë një bisede me gazetarët në “Air Force One”, siç raporton Forbes Breaking News.
I pyetur nëse kjo çështje është pjesë e ndonjë diskutimi me liderët evropianë apo me presidentin rus Vladimir Putin, ai mohoi.
“Ne duhet ta kemi Grenlandën për shkak të tablosë së sigurisë kombëtare, edhe më shumë tani sesa 20 apo 30 vjet më parë, kur flitej për të edhe atëherë”, shtoi Trump.
Ai theksoi se me zhvillimet moderne në armatime, aviacion dhe shpejtësinë e avionëve, rëndësia strategjike e Grenlandës për SHBA-në është rritur.
Grenlanda, e cila është një territor nën sovranitetin danez që nga viti 1953, ka tërhequr interesin e Trumpit për shkak të pozitës së saj strategjike dhe burimeve të saj minerale. Tensionet mbi këtë çështje u thelluan pasi ai nuk përjashtoi veprime ekonomike ose ushtarake për ta siguruar kontrollin mbi ishullin, duke e cilësuar atë si kritik për mbrojtjen e botës së lirë.
Trump më parë e ka përshkruar zotërimin e Grenlandës si një “domosdoshmëri absolute” për sigurinë ekonomike të SHBA-së, duke e krahasuar blerjen e saj me një “marrëveshje të madhe të pasurive të paluajtshme”.
Megjithatë, ashtu si plani i tij për të dëbuar palestinezët nga Gaza, edhe propozimi për Grenlandën është refuzuar me vendosmëri nga Danimarka dhe banorët e ishullit.