Rezultati i dobët në zgjedhjet e 28 dhjetorit, ku Lidhja Demokratike e Kosovës u rendit e treta me rreth 13% të votave, ka nxitur një valë pakënaqësish të brendshme. Ish-nënkryetari i LDK-së, Agim Veliu, ka kërkuar zyrtarisht dorëheqjen e liderit Lumir Abdixhiku dhe shpalljen e zgjedhjeve të reja brenda partisë.
Veliu, i cili mbeti jashtë listave zgjedhore në proceset e fundit, theksoi se mesazhi ndëshkues i qytetarëve nuk mund të injorohet. “Si kontribuues i LDK-së, ndiej obligim moral të them se humbjet e rënda nuk relativizohen me heshtje. Dorëheqja nuk është dobësi, por akt pjekurie politike,” deklaroi Veliu. Sipas tij, partia ka nevojë për një analizë të thellë të shkaqeve të humbjes dhe hapje të vërtetë demokratike, duke braktisur arsyetimet nëpër studio televizive.
Përplasja u ashpërsua pas deklaratave të Abdixhikut, i cili i quajti “mercenarë” kritikët e Besian Mustafës. Ky i fundit kishte pohuar se LDK nuk duhej ta votonte Hashim Thaçin për president. Abdixhiku, përmes një reagimi të ashpër, akuzoi kritikët si njerëz të shitur dhe të lidhur me krimin, duke u zotuar se nuk do të lejojë një botëkuptim të tillë brenda subjektit.
Krahas Veliut, kërkesa për qartësi dhe përgjegjësi kanë ardhur edhe nga Besnik Berisha, i cili bëri thirrje për komunikim të hapur dhe jo etiketime. Megjithëse Abdixhiku fillimisht paralajmëroi mbledhjen e Kuvendit të Partisë për të shqyrtuar përgjegjësinë e tij, një hap i tillë ende nuk është ndërmarrë. Ndërkohë, anëtari Florim Zeqa ka shprehur ambicien për të udhëhequr LDK-në, teksa aleati nga Partia e Drejtësisë, Ferid Agani, u shpreh se rezultati nuk e zbeh vlerën e bashkëpunimit me partinë më të vjetër në vend. /lajmishqip.net
