Plazhi i Velipojës u bë skena e dy ngjarjeve tragjike ditën e djeshme, ku dy pushues nga Kosova, të dy të moshuar, humbën jetën në rrethana të ndryshme.
Sipas burimeve zyrtare nga Policia e Shkodrës, viktima e parë është shtetasi Z. J., 72 vjeç. Ai dyshohet se është mbytur aksidentalisht teksa notonte në det, dhe tashmë çështja i ka kaluar Prokurorisë për hetimet e mëtejshme.
Në një tjetër incident të ndarë, por po aq fatal, shtetasi Gj. K., 80 vjeç, gjithashtu nga Kosova, ndërroi jetë. Dyshimet paraprake janë se ai ka pësuar një arrest kardiak menjëherë pas daljes nga uji.
Autoritetet policore po vijojnë hetimet për zbardhjen e plotë të rrethanave të të dyja ngjarjeve. Njëkohësisht, ato kanë ripërsëritur thirrjen për të gjithë pushuesit që të tregojnë kujdes të shtuar gjatë qëndrimit në plazh, veçanërisht duke pasur parasysh temperaturat e larta të ditëve të fundit../lajmishqip.net
