Bashkimi Evropian ka dënuar ashpër sulmin ajror izraelit në Doha kundër liderëve të Hamasit, duke e cilësuar atë si një “shkelje flagrante të së drejtës ndërkombëtare” dhe një akt që rrezikon përshkallëzimin e dhunës në mbarë rajonin.
Në një deklaratë zyrtare të lëshuar mbrëmjen e së martës, zëdhënësi i Shefes së Politikës së Jashtme të BE-së, Kaja Kallas, theksoi se veprime të tilla minojnë integritetin territorial të Katarit. “Shprehim solidaritet të plotë me autoritetet dhe popullin e Katarit, një partner strategjik i Bashkimit Evropian,” u shpreh ai përmes një postimi në platformën X.
Zyrtari i lartë i BE-së shtoi se shmangia e çdo përshkallëzimi të mëtejshëm të konfliktit është thelbësore, pasi nuk i shërben interesit të askujt. Duke rikonfirmuar qëndrimin e bllokut, ai theksoi se mbështetja për arritjen e paqes mbetet prioritet.
“Ne do të vazhdojmë të mbështesim të gjitha përpjekjet drejt një armëpushimi në Gaza,” përfundoi deklarata./lajmishqip.net
