Profesori amerikan Daniel Serwer, ka thënë se BE-ja po sillet si kundërshtare e sovranitetit të Kosovës
Profesori amerikan Daniel Serwer, e ka kritikuar qasjen e Bashkimit Evropian ndaj shtetit të Kosovës.
Ai iu referua reagimit të deklaratës së zëdhënësit të BE-së, Peter Stanos, i cili tha se Kosova nuk ka bërë aq sa duhet për deeskalimin e situatës në veri.
Serwer u tha se BE është bërë de facto kundërshtare e integritetit territorial të Kosovës.
“BE-ja është bërë de facto kundërshtare e sovranitetit dhe integritetit territorial të Kosovës. Ajo dëshiron të kufizojë dislokimet e policisë në përgjigje të një kërcënimi të qartë dhe aktual, si dhe të krijojë një strukturë të veçantë qeverisëse për popullatën serbe, të paktën në veri”, ka thënë ai.
Vlen të theksohet se masat ndëshkuese ndaj Kosovës ende janë në fuqi, kurse ndaj Serbisë nuk ka pasur asnjë sanksion, përkundër sulmit terrorist në Banjskë të Zveçanit më 24 shtator.