Kryetari i Lidhjes Demokratike të Kosovës, Lumir Abdixhiku, ka thyer heshtjen pas rezultateve të fundit zgjedhore, duke pranuar verdiktin e sovranit me dinjitet, pavarësisht dhimbjes që kjo humbje solli për të dhe strukturat mbështetëse të partisë.
Përmes një mesazhi drejtuar qytetarëve në përmbyllje të vitit, Abdixhiku shprehu mirënjohje të thellë për të gjithë ata që investuan kohë, energji dhe pasion në projektin e LDK-së. Ai nënvizoi se, ndonëse zhgënjimi është i pranishëm, besimi te Kosova, vlerat demokratike dhe e ardhmja e vendit mbetet i palëkundur.
“Ky është një moment reflektimi të thellë personal. Kam shërbyer me ndershmëri të plotë, por ndonjëherë edhe përpjekja maksimale nuk mjafton për të arritur qëllimin; këtë realitet e pranoj me kokën lart,” u shpreh ai, duke paralajmëruar se do t’i shpalosë hapat e tij të ardhshëm politikë në kohën e duhur.
Në një notë më njerëzore, Abdixhiku vuri theksin te rëndësia e familjes, duke shprehur dëshirën për t’u dedikuar më shumë kohë vajzave të tij. Ai e përmbylli mesazhin me një urim për Vitin e Ri 2026, duke kërkuar një vit më solidar dhe më të drejtë për Kosovën, me shëndet, paqe dhe besim te e mira./lajmishqip.net
