Ministria e Mbrojtjes Kombëtare e Turqisë ka njoftuar se një projektil balistik, i lëshuar nga territori i Iranit, ka përshkuar hapësirën ajrore të Irakut dhe Sirisë me synim goditjen e territorit turk.
Përmes një komunikate zyrtare, autoritetet në Ankara sqaruan se raketa u asgjësua në fluturim nga sistemet e mbrojtjes ajrore dhe raketore të NATO-s, përpara se të depërtonte në hapësirën sovrane të Turqisë, bëjnë të ditur mediet turke.
Saktësisht, dikasteri turk i mbrojtjes ka specifikuar rrethanat e incidentit:
“Një raketë balistike, e shkrepur nga Irani dhe e identifikuar gjatë lëvizjes drejt kufijve tanë ajrorë, pasi kaloi mbi Irak dhe Siri, u neutralizua menjëherë nga mbrojtja raketore e NATO-s e stacionuar në Mesdheun Lindor”.
Më tej, Ankaraja zyrtare ka lëshuar një paralajmërim të prerë:
-
Mbrojtja e territorit: Çdo veprim i ndërmarrë për mbrojtjen e tërësisë territoriale dhe hapësirës sonë ajrore do të jetë i vendosur dhe pa asnjë hezitim.
-
E drejta për reagim: Kujtojmë se e rezervojmë të drejtën legjitime për t’iu kundërpërgjigjur çdo akti armiqësor që shënjestron vendin tonë.
Gjithashtu, sipas njoftimit, mbetjet që ranë në rajonin e Dertyolit në provincën e Hatay-it i përkisnin sistemit të mbrojtjes ajrore turke, i cili arriti ta asgjësonte kërcënimin në ajër. Fatmirësisht, nga ky incident nuk pati viktima apo persona të lënduar./lajmishqip.net
