Këshilli Prokurorial i Kosovës, institucion që zakonisht operon brenda kornizave teknike, e mbylli vitin 2025 si një vatër akuzash të ashpra mes krerëve të drejtësisë, duke prodhuar valë reagimesh në të gjitha nivelet.
Gjithçka nisi më 20 nëntor, kur anëtarët e Këshillit morën vendimin për shkarkimin e Besim Kelmendit nga pozita e u.d. të Kryeprokurorit të Shtetit, vetëm një ditë pasi ai dëshmoi në Prokurorinë Speciale lidhur me veprimtarinë e tij gjatë periudhës së luftës në Reçak.
Megjithëse Kelmendi e ka atakuar këtë vendim në gjykatë duke e cilësuar si të kundërligjshëm, kryesuesi i KPK-së, Ardian Hajdaraj, ka insistuar publikisht se procedurat janë zhvilluar në përputhje të plotë me legjislacionin, njofton RTK.
Organizatat monitoruese e kanë dënuar këtë akt si arbitrar dhe abuziv, duke denoncuar një “mentalitet korporatist” dhe mbijetesën e grupeve të vjetra të interesit brenda KPK-së, shqetësime këto që janë reflektuar edhe në raportet alarmante të Komisionit të Venecias.
Domosdoshmëria për reforma radikale është rikonfirmuar edhe nga Zyra e Bashkimit Evropian në Prishtinë, e cila ka kërkuar zbatim të menjëhershëm të ndryshimeve pas një takimi urgjent me anëtarët e Këshillit.
Në këtë kontekst, procesi i reformimit pritet të marrë formë të prerë në janar, kur përfundon mandati i pesë anëtarëve aktualë, të cilët ligjërisht nuk gëzojnë të drejtën e rizgjedhjes.
“Drejtësia duhet të fillojë nga vetë institucioni; si degë e pavarur kushtetuese, mënyra e tanishme e funksionimit e dëmton rëndë frymën e shtetit të së drejtës”, ka deklaruar Blerim Sallahu, u.d. ministër i Drejtësisë.
Por, çka përmban në thelb kjo reformë? Ligji i ri, i fuqizuar nga qershori i vitit 2025, parasheh tkurrjen e Këshillit nga 13 në vetëm 7 anëtarë, duke përfshirë për herë të parë anëtarë joprokurorë që do të përzgjidhen nga Kuvendi.
“Nëse analizojmë sjelljet e grupeve brenda mbledhjeve, vërehet qartë një tendencë për të ruajtur kontrollin korporatist edhe para janarit të vitit 2026, kur pritet të ndihen efektet e para të ndryshimeve”, thekson Gzim Shala nga IKD.
Ky transformim institucional do të kulmojë në janar me largimin e pesë anëtarëve të vjetër, ndërsa struktura e re do të funksionojë me një format të ri vendimmarrjeje prej pesë plus një anëtar./lajmishqip.net