Administrata Trump po shqyrton seriozisht mundësinë e dërgimit të pagesave të drejtpërdrejta për banorët e Groenlandës, si një mjet për t’i bindur ata që të shkëputen nga Danimarka dhe t’i bashkohen Shteteve të Bashkuara, sipas zyrtarëve amerikanë të cituar në një raport ekskluziv të Reuters.
Këto pagesa pritet të arrijnë deri në 100,000 dollarë për person, teksa ekipi i Trumpit po analizon paralelisht opsionet ushtarake dhe ato diplomatike për të marrë kontrollin mbi ishullin strategjik.
Sipas hulumtimit të Reuters, propozimi për të subvencionuar drejtpërdrejt popullsinë grenlandeze si stimul për anësimin drejt SHBA-së po diskutohet intensivisht në qarqet e larta amerikane. Megjithëse shuma finale dhe modalitetet mbeten ende në diskutim, këshilltarët e afërt të Presidentit Donald Trump kanë lënë të kuptohet se shifrat mund të variojnë nga 10,000 deri në 100,000 dollarë për çdo banor.
Kjo ide e injektimit të kapitalit direkt tek qytetarët ofron një pasqyrë të qartë se si Uashingtoni synon ta “blejë” territorin me 57,000 banorë, pavarësisht faktit se Kopenhaga dhe autoritetet vendase në Nuuk kanë deklaruar prerazi se Groenlanda nuk është objekt tregtie.
Ky projekt është pjesë integrale e strategjisë së Shtëpisë së Bardhë për akomodimin e Groenlandës, ku nuk përjashtohen as manovrat ushtarake, ndonëse oferta financiare mund të shihet si provokim për një popull që kërkon pavarësi të plotë nga varësia ekonomike daneze.
Iniciativa për pagesat vjen pas insistimit të vazhdueshëm të Presidentit Donald Trump për blerjen e ishullit. Edhe pse liderët evropianë kanë reaguar me tone refuzuese, debati brenda administratës amerikane po vijon me intensitet të shtuar.
Shtetet e Bashkuara po eksplorojnë skenarë të ndryshëm, ku përfshihet edhe mundësia e një marrëveshjeje të “Asociimit të Lirë” (COFA), model ky që Uashingtoni e aplikon aktualisht me disa shtete ishullore në Paqësor.
Për momentin, çështja mbetet në tavolinën e diskutimeve ku administrata Trump po peshon të gjitha variantet, duke prioritizuar interesat strategjike, gjeopolitike dhe dominimin ekonomik të SHBA-së në Arktik./lajmishqip.net
