Presidentja e Republikës së Kosovës, Vjosa Osmani, ka deklaruar me bindje se prania ushtarake e Shteteve të Bashkuara në kuadër të NATO-s nuk do të pësojë reduktime. Ky qëndrim vjen si përgjigje ndaj diskutimeve që pasuan publikimin e Strategjisë Kombëtare të Sigurisë së SHBA-së.
Në një intervistë ekskluzive për Bloomberg në Bruksel, Osmani nënvizoi se Ballkani Perëndimor mbetet një zonë me rëndësi jetike strategjike për Uashingtonin, përfshirë këtu edhe administratën e presidentit Donald Trump. Ajo kujtoi se Kosova është një sukses historik i politikës së jashtme amerikane, duke gëzuar mbështetje të palëkundur dypartiake.
Presidentja rikujtoi faktin se pavarësia e Kosovës u shpall gjatë një administrate republikane dhe se mandati i parë i Trump-it solli zhvillime pozitive. Sipas saj, ekziston një potencial i madh që edhe në mandatin e dytë të tij të shënohen hapa përpara për çështjet kyçe në rajon.
Edhe pse simbolike në numër, me rreth 500 deri në 600 trupa, Osmani vlerëson se prania amerikane është garantuesja kryesore e stabilitetit. Ajo e cilësoi këtë angazhim si mekanizmin më të fuqishëm parandalues kundër çdo përpjekjeje për tensionim të situatës. Sipas presidentes, Trump ka treguar interes të veçantë për të shmangur përshkallëzimet dhe për të ruajtur paqen në Ballkan.
Sa i përket dialogun me Serbinë, Osmani adresoi lidershipin në Beograd si pengesën kryesore. Ajo theksoi se synimi i Kosovës mbetet integrimi në BE dhe NATO përmes një partneriteti të ngushtë me SHBA-në, për t’u siguruar brezave të rinj një të ardhme në paqe.
Në mbyllje, Presidentja Osmani kritikoi qasjen e Bashkimit Evropian, duke vlerësuar se toleranca e tepërt ndaj Beogradit ka nxitur sjellje konfrontuese, pasi Serbia vazhdon të mos harmonizohet me politikat dhe vlerat evropiane./lajmishqip.net