Shërbimi i Kërkim-Shpëtimit Malor i Kosovës (ShKShMK) ka njoftuar përfundimin me sukses të një operacioni shpëtimi për një shtetase italiane në zonën e Brezovicës, saktësisht në brezin kufitar mes Kosovës dhe Maqedonisë së Veriut.
Ngjarja ka ndodhur më 7 mars 2026, kur një grup turistësh italianë po skijonin në terrenin mes Majës së Gurit të Zi dhe Majës së Liqenit. Gjatë këtij aktiviteti, njëra nga ski-bjeshkataret pësoi një frakturë të rëndë në këmbë, duke e bërë të pamundur lëvizjen e saj nga vendi i aksidentit.
Përballë kësaj situate kritike, ShKShMK angazhoi dy ekipe operacionale nga qendra skitare e Brezovicës. Ekipi i parë arriti me shpejtësi në vendngjarje për të ofruar ndihmën e parë dhe për të bërë imobilizimin e të lënduarës, ndërsa ekipi i dytë u bashkua më pas me pajisje kolektive për të mundësuar evakuimin e sigurt.
Duke pasur parasysh terrenin e izoluar dhe faktin që pika e aksidentit ndodhej brenda territorit të Maqedonisë së Veriut, u vendos që evakuimi të kryhej përmes helikopterit. Ky veprim u realizua në bashkëpunim të ngushtë me autoritetet përkatëse të RMV-së për të siguruar transportin e shpejtë mjekësor.
Gjatë gjithë operacionit, ShKShMK mbajti një koordinim të vazhdueshëm me Ambasadën e Italisë në Kosovë, atë në Maqedoninë e Veriut dhe Agjencinë Italiane për Bashkëpunim dhe Zhvillim (AICS Tirana). Mbështetje të rëndësishme ofroi edhe menaxhmenti i Qendrës së Skijimit në Brezovicë (AKP), duke bërë që i gjithë misioni të mbyllej me sukses. /lajmishqip.net