Presidenti i Turqisë, Recep Tayyip Erdogan, ka deklaruar se objektivi madhor i Ankarasë është ta mbajë vendin jashtë konfliktit rajonal që po përshkallëzohet me shpejtësi. Ai theksoi se mbrojtja e sigurisë dhe e paqes për 86 milionë qytetarët turq mbetet prioriteti absolut i qeverisë së tij.
“Qëllimi ynë kryesor është ta mbajmë vendin tonë larg këtij zjarri. Sigurimi i sigurisë së Turqisë dhe paqes së qytetarëve të saj është përparësia jonë më e madhe”, theksoi Erdogan të hënën, sipas raportimeve të mediave ndërkombëtare.
Lideri turk nënvizoi se, në mes të krizës me Iranin, Ankaraja qëndron e palëkundur në krah të drejtësisë, ligjit ndërkombëtar dhe stabilitetit. Ai rikonfirmoi mbështetjen e shtetit turk për zgjidhjen e mosmarrëveshjeve përmes rrugëve diplomatike dhe dialogut të hapur.
Për të dëshmuar këtë qasje, Erdogan zbuloi se Turqia është përfshirë në një ofensivë intensive diplomatike që nga nisja e konfliktit të armatosur.
“Ne kemi zhvilluar bisedime me 16 udhëheqës botërorë për të gjetur një rrugëdalje nga kjo krizë”, bëri të ditur ai.
Koordinimi i ngushtë me NATO-n
Më tej, presidenti sqaroi se Turqia po vëzhgon me vëmendje maksimale çdo zhvillim, në bashkërendim të plotë me NATO-n dhe aleatët e tjerë strategjikë.
Ai garantoi se do të merren hapa të mëtejshëm për të blinduar sigurinë kombëtare, duke shtuar: “Ne do të ndjekim situatën në koordinim me aleatët tanë dhe do të vazhdojmë të ndërmarrim masa shtesë për të përforcuar mbrojtjen tonë”.
Gjatë fjalës së tij, Erdogan u kujdes të qetësonte opinionin publik edhe sa i përket sigurisë energjetike. Ai siguroi se vendi nuk kanoset nga asnjë rrezik i afërt, falë investimeve dhe masave paraprake të marra ndër vite.
“Nuk po përballemi me asnjë rrezik falë investimeve që kemi bërë, marrëveshjeve që kemi nënshkruar dhe masave që kemi marrë për të siguruar furnizimin tonë me energji”, sqaroi kreu i shtetit turk.
Sa i përket logjistikës dhe qarkullimit kufitar, ai konfirmoi se tre pikat doganore të Turqisë përgjatë kufirit me Iranin po funksionojnë pa asnjë ndërprerje.
Nivel i lartë gatishmërie është shpallur edhe në hapësirën ajrore. Presidenti bëri të ditur se qiejt e Turqisë po monitorohen 24 orë në ditë për të neutralizuar çdo kërcënim.
“Aeroplanët tanë luftarakë F-16, sistemet e paralajmërimit të hershëm dhe aeroplanët cisternë janë në monitorim të pandërprerë të hapësirës sonë ajrore”, saktësoi ai.
Paralajmërimi i ashpër për Teheranin
Në fund të fjalës së tij, Erdogan lëshoi një paralajmërim të drejtpërdrejtë për Iranin. Ai theksoi se, pavarësisht këshillave të sinqerta të Ankarasë, po vazhdojnë të hidhen “hapa jashtëzakonisht të gabuar dhe provokues”, të cilët rrezikojnë të tensionojnë rëndë raportet dypalëshe.
Duke bërë thirrje për maturi, ai kërkoi që të shmangen veprimet që mund të cenojnë marrëdhëniet historike mes dy vendeve.
“Askush nuk duhet të bëjë llogari që do të hidhnin hije mbi lidhjet tona mijëvjeçare fqinjësore e vëllazërore me Iranin, apo që do të lëndonin kombin tonë”, paralajmëroi Erdogan.
Presidenti e mbylli fjalën duke ritheksuar se qëndrimi i Turqisë është i qartë dhe se Ankaraja po bën përpjekje të jashtëzakonshme për të parandaluar përhapjen e konfliktit dhe për të shmangur më shumë gjakderdhje në rajon./lajmishqip.net
