Kryeministri në detyrë, Albin Kurti, ka konfirmuar në një konferencë për media se i ka bërë një ofertë konkrete për bashkëqeverisje kryetarit të NISMA-s, Fatmir Limaj, pa specifikuar detajet e saj.
Ai sqaroi se në rast se nuk arrihet një marrëveshje mes Lëvizjes Vetëvendosje dhe NISMA-s, e ardhmja politike pas 26 korrikut, datës së caktuar nga Gjykata Kushtetuese për konstituimin e Kuvendit, mbetet e paqartë, duke theksuar se qeveria aktuale do të vazhdojë me kompetenca të kufizuara.
Gjatë konferencës, Kurti deklaroi se nuk mund të zbulojë hollësi nga oferta e bërë për NISMA-n deri në finalizimin e bisedimeve gjatë kësaj jave, kur pritet të arrihet një rezultat përfundimtar, raporton lajmishqip.
“Me kryetarin e NISMA-s kemi diskutuar zhvillimet politike dhe kam shprehur gatishmërinë për të bashkëqeverisur. I kam bërë një ofertë konkrete me shpresën që gjithçka të përmbyllet sa më shpejt, për të konstituuar Kuvendin dhe Qeverinë e re. Për hollësitë do të flasim kur bisedimet të kenë një përfundim”, deklaroi Kurti.
Më tej, ai komentoi aktgjykimin e Gjykatës Kushtetuese, duke ritheksuar se mosmarrëveshjet mes grupeve parlamentare duhet të zgjidhen në tryezën e partive, gjë që deri më tani nuk ka ndodhur.
Kryeministri në detyrë pohoi se po i japin një shans të fundit bisedimeve me NISMA-n për konstituimin e Kuvendit, duke shprehur besimin se një marrëveshje bashkëpunimi është ende e mundur.
Kurti kërkoi durim deri në fundjavë, duke thënë se atëherë “ose do të kemi lajmin për marrëveshjen e arritur, ose do të shohim se çfarë do të ndodhë pas skadimit të afatit”.
Ky intensifikim i negociatave vjen pas takimit të së shtunës, më 19 korrik, mes Kurtit dhe Limajt, ku u diskutua për një marrëveshje të mundshme politike.
Pavarësisht spekulimeve se Limaj mund të propozohej për Kryetar të Kuvendit, kjo nuk ndodhi në seancën e sotme, e cila dështoi për herë të 50-të radhazi në përpjekje për të zgjedhur komisionin për votim të fshehtë.
Ndërkohë, kanë mbetur vetëm dy seanca para skadimit të afatit të 26 korrikut të caktuar nga Gjykata Kushtetuese, dhe vendi vazhdon të jetë në një ngërç të thellë politik pa një zgjidhje në horizont, raporton lajmishqip.