Policia e Kosovës ka lëshuar një alarm urgjent për qytetarët, duke paralajmëruar për një fushatë masive mashtrimi (phishing) që po përhapet përmes mesazheve SMS. Sipas autoriteteve, qytetarët po pranojnë njoftime të rreme që maskohen sikur vijnë nga Posta e Kosovës, por që në fakt përmbajnë linqe dashakeqe.
Synimi i këtyre sulmeve është vjedhja e të dhënave personale dhe informacioneve të kartelave bankare për të kryer keqpërdorime financiare. “Policia e Kosovës sqaron se Posta e Kosovës nuk ka dërguar mesazhe të tilla dhe se faqet e paraqitura në këto SMS nuk janë domene zyrtare,” thuhet në njoftimin e PK-së.
Për të mbrojtur sigurinë tuaj, Policia u bën thirrje qytetarëve:
-
të mos klikojnë në asnjë link që duket i dyshimtë;
-
të refuzojnë dhënien e të dhënave personale apo bankare;
-
të mos kryejnë asnjë lloj pagese përmes këtyre platformave;
-
të fshijnë menjëherë këto mesazhe mashtruese nga pajisjet e tyre.
Në rast se keni rënë pre e mashtrimit dhe keni kryer pagesa, njoftoni menjëherë bankën tuaj për të anuluar transaksionin dhe raportoni rastin në stacionin më të afërt policor. Policia e Kosovës mbetet e përkushtuar në luftimin e krimeve kibernetike dhe kërkon bashkëpunim e vigjilencë të lartë nga ana e publikut. /lajmishqip.net