Duke folur sot në Bundestag për buxhetin e vitit të ardhshëm, kancelari gjerman Olaf Scholz paralajmëroi bashkëqytetarët se po përballen me “probleme të mëdha ekonomike”.
Në këtë paralajmërim ai iu referua studimeve nga i gjithë vendi dhe si shkaktar i këtyre problemeve vuri në dukje plakjen e fuqisë punëtore. Prandaj ai beson se zgjidhja qëndron te emigracioni.
“Nuk ka asnjë vend në botë me ulje të numrit të popullsisë në moshë pune që të ketë rritje ekonomike. Kjo është e vërteta me të cilën po përballemi”, vuri në dukje Scholz.
Në përgjigje të këtij problemi, ai kujtoi se qeveria kishte thjeshtuar rregullat ligjore për marrjen e shtetësisë dhe për punëtorët e kualifikuar.
“Ne duam që njerëzit të vijnë këtu për të punuar, për të mësuar gjuhën gjermane, për të respektuar ligjin, për të fituar bukën e gojës, por edhe për të pasur të drejtën e votës”, tha ai.
Ai po ashtu kujtoi se duhet investuar më shumë në infrastrukturë, raporton euronews.
“Në 10 vjet duhet të investojmë miliarda euro në rindërtimin e infrastrukturës sepse gjithçka është lënë pas dore prej vitesh. Kjo vlen për rrugët, rrjetin celular dhe shpejtësinë e miratimit të objekteve industriale”, theksoi ai.
Scholz siguron se qeveria e tij u jep përparësi të rinjve dhe familjeve.
“Ne po japim miliarda për të siguruar zgjerimin e shkollave dhe kopshteve”, theksoi ai.
Ai gjithashtu pohon se Gjermania ka potencial për të përmirësuar potencialin e saj të rritjes./Telegrafi