Nga 21 maji deri më 2 qershor Kosova do të jetë nikoqire e ushtrimit më të madh ndërkombëtar ushtarak “Defender Europe” 23.
Në kuadër të përgatitjeve për ushtrimin “Defender Europe 2023”, së fundi në FSK është realizuar ushtrimi fushor “Steel Alpha 2023”, për valdimin e Kompanisë A dhe Togut IVR nga Regjimenti i Dytë i Forcave Tokësore.
Forcat e Sigurisë së Kosovë kanë njoftuar se në këtë ushtrim janë kryer stërvitje për operacione të mbrojtjes, sulmuese dhe armatim.
“Në këtë ushtrim janë kryer stërvitje për operacione të mbrojtjes, sulmuese, të sigurisë dhe stabilitetit, duke i përfshi këtu edhe stërvitjet në nivel kompanie (LFX) me të gjitha sistemet e armatimit”, njofton FSK.
Ministri i Mbrojtjes, Armend Mehaj para disa ditësh ka deklaruar se ky ushtrim do të jetë një test i radhës për ushtrinë e Kosovës, në të cilin do të përgatiten kapacitetet tona luftarake.
“Përgëzoj shtabin, partnerët tanë dhe të gjithë ata që janë duke u angazhuar maksimalisht që ky ushtrim të jetë në nivelin më të lartë organizativ. Ushtria e Kosovës do të jetë pjesë e NATO-se dhe në bazë të standardeve të saj është duke u forcuar çdo ditë. Kosova në NATO është gjithashtu një nga amanetet e dëshmorëve tanë”, ka deklaruar ministri.
Kosova do të marrë pjesë me mbi 1300 trupa të Forcës së Sigurisë së Kosovës në stërvitjen fushore “Defender Europe ’23”, përkrah forcave amerikane dhe aleatëve tjerë.
Gjithashtu, me këtë rast, Republika e Kosovës, do të ketë edhe statusin e vendit pritës.
Në këtë stërvitje do të validohet edhe një regjiment me njësitë të tjera të specializuara që e mbështesin në stërvitje. /Telegrafi