Presidenti i Turqisë, Recep Tayyip Erdogan, ka njoftuar se të hënën e ardhshme do të zhvillojë një bisedë të re telefonike me presidentin amerikan, Donald Trump. Ky njoftim u bë nga vetë Erdogan pas faljes së namazit të xhumasë në Stamboll, ku ai konfirmoi: “Të hënën do të kemi një diskutim tjetër me presidentin amerikan Donald Trump”.
Gjatë fjalës së tij, udhëheqësi turk u ndal edhe te mbështetja masive popullore për Palestinën gjatë festimeve të Vitit të Ri. Ai e cilësoi tubimin gjigant në Urën Galata si një “moment historik”, i cili dëshmoi qartë se populli palestinez nuk është i vetëm në kauzën e tij.
Presidenti Erdogan lëshoi akuza të forta ndaj kryeministrit izraelit, duke përdorur një gjuhë të ashpër biblike dhe politike. “Ajo që ka bërë ky faraon i quajtur Benjamin Netanyahu nuk do të mbetet pa u ndëshkuar, sepse ai ka marrë mallkime të panumërta nga njerëzit e shtypur, që nga të rinjtë e deri te të moshuarit”, deklaroi ai.
Më tej, ai dënoi ashpër operacionet ushtarake të Izraelit në Gaza dhe përkeqësimin drastik të krizës humanitare. Duke vënë theksin te dhimbja njerëzore, Erdogan nënvizoi se vuajtjet e fëmijëve në Gaza, të cilët jetojnë në tenda mes kushteve të rënda atmosferike, nuk do të mbeten pa përgjigje dhe se Netanyahu nuk do të mund t’i shmanget llogaridhënies para drejtësisë. /lajmishqip.net