Gjatë ditës së sotme kanë qarkulluar raportime se profesori universitar, Ardian Gola, pritet të emërohet Ministër i Arsimit në kuadër të kabinetit të ri qeveritar “Kurti 3”.
Lidhur me këtë çështje, Indeksonline ka kontaktuar personalisht zotin Gola për të marrë një qëndrim zyrtar. Ndonëse fillimisht e ka mohuar vërtetësinë e këtyre lajmeve në këtë fazë, ai është shprehur i gatshëm për të marrë përsipër këtë përgjegjësi nëse një gjë e tillë do t’i kërkohej nga strukturat e partisë.
‘’Janë qarkullime publike dhe dëshira të njerëzve; për momentin nuk ka asgjë të vërtetë. Kjo mbetet çështje e strukturave. Ka shumë detyra që mbase nuk i dëshirojmë, por i pranojmë për shkak të përgjegjësisë sonë profesionale’’, ka deklaruar Gola.
Vlen të theksohet se Ardian Gola doli mjaft i fuqishëm nga zgjedhjet e 28 dhjetorit, ku arriti të siguronte gjithsej 34,201 vota. /lajmishqip.net
