Ekzistojnë pritshmëri konkrete që gjatë javës së ardhshme të zyrtarizohet shfuqizimi i plotë i masave shtrënguese të Bashkimit Evropian ndaj Kosovës. Burime diplomatike nga Brukseli bëjnë të ditur jozyrtarisht se kjo e hënë mund të shënojë datën vendimtare për marrjen e këtij aktvendimi final.
Sipas informatave konfidenciale, brenda Komisionit Evropian tashmë janë përmbyllur të gjitha hallkat e nevojshme procedurale që bien nën kompetencën e këtij dikasteri. Tashmë pritet vetëm takimi i delegatëve të shteteve anëtare që mbulojnë Ballkanin Perëndimor për ta vulosur procesin, raporton RTK.
Gjatë kësaj mbledhjeje, e cila është planifikuar të zhvillohet të hënën, parashihet të votohet pro largimit të sanksioneve ndaj shtetit të Kosovës.
Ky regjim sanksionues u aplikua fillimisht në vitin 2023. Ndonëse një vit më pas ish-kryediplomati evropian, Josep Borrell, dha dritën jeshile për heqje, u nevojitën më shumë se 18 muaj pritje deri në finalizimin e vendimit.
Përgjatë kësaj periudhe, rreth 400 milionë euro fonde të asistencës evropiane mbetën të ngrira. Pas zhbllokimit të gjysmës së kësaj shume në fund të vitit 2025, tashmë pritet lëshimi i pjesës së mbetur të miliona eurove./lajmishqip.net