Vizita e fundit e Kryeministrit të Shqipërisë, Edi Rama, në Kosovë ka nxitur debate të ashpra mes analistëve, veçanërisht pas pretendimeve të tij të forta lidhur me Presidenten Vjosa Osmani.
Në studion e emisionit “Debat Plus”, analisti Imer Mushkolaj vlerësoi se Rama e ka vendosur Presidenten në një pozitë të papritur duke bërë publik një “sekret” shtetëror. Sipas tij, zbulimi se Osmani është përballur me një presion të jashtëzakonshëm dyvjeçar nga hetuesit e Hagës për të dorëzuar materiale zyrtare, përbën një informacion që nuk ishte bërë kurrë publik më parë.
Ndonëse Mushkolaj e interpretoi këtë si një formë mbështetjeje, ai pyeti me cinizëm nëse ky zbulim ishte vërtet një befasi për opinionin.
Nga një tjetër këndvështrim, analisti Ylli Hoxha e konsideroi simpatinë e shfaqur të Ramës si një “bakshish” politik ndaj Osmanit. Ai vuri në dukje se, pavarësisht vizitës, mungesa e një konference të përbashkët për media dëshmon se mes palëve ekzistojnë ende mospajtime të thella të cilat tentohen të eskivohen në rrugë diplomatike.
Ndërkaq, Sadri Ramabaja u shpreh më kritik, duke theksuar një mungesë patriotizmi në Tiranë, të cilën sipas tij, angazhimi i Ramës në Prishtinë nuk e përmbush. Ai kritikoi përzierjen e Kryeministrit në çështjet e Presidencës, duke i cilësuar afrimet e tij si jo shumë të natyrshme.
Në qendër të këtij debati qëndron deklarata e Ramës, i cili pohoi se Presidentja Osmani u kërcënua për dy vjet rresht nga prokurorët e Dhomave të Specializuara.
Sipas tij, ajo refuzoi kategorikisht kontrollin në Zyrën e Presidentit për materiale që mund të dëmtonin imazhin e vendit, duke zgjedhur të mbrojë nderin e saj dhe të Republikës së Kosovës. /lajmishqip.net
