Klubi i Dritës vazhdon të bëjë histori në garat evropiane, duke u konfirmuar zyrtarisht si skuadra e parë nga Kosova që siguron kalimin në fazën e eliminimit direkt të Conference League. Me këtë arritje, kampioni kosovar rreshtohet mes 24 ekipeve më të mira të këtij kompeticioni prestigjioz, duke vulosur kualifikimin për në raundin e 1/16-ve.
Edhe pse pësuan humbje 3-0 në përballjen e vështirë të së sotmes ndaj Rayo Vallecano-s, gjilanasit arritën të renditen në vendin e 20-të, duke grumbulluar plot 8 pikë në tabelën e përgjithshme.
“Intelektualët” dëshmuan një paraqitje dinjitoze gjatë gjithë këtij rrugëtimi sezonal, duke regjistruar fitore të rëndësishme ndaj Shelbourne dhe Shkëndijës, barazime me KuPS dhe Omonian, krahas humbjeve kundër AZ Alkmaar dhe spanjollëve të Rayo-s. Ky moment shënon një kapitull të ri dhe një sukses historik, jo vetëm për klubin e Dritës, por për të gjithë futbollin e Kosovës./lajmishqip.net
