Ministria e Punëve të Jashtme dhe Diasporës (MPJD) ka bërë të ditur se Gjykata e Lartë në Beograd, konkretisht Departamenti për Krime të Luftës, i ka caktuar masën e paraburgimit prej 30 ditësh shtetasit kosovar, Lulzim Halili. Vendimi u mor më 24 korrik 2025, dy ditë pas arrestimit të tij nga autoritetet serbe më 22 korrik, raporton lajmishqip.
Akuza ndaj Halilit, siç bëhet e ditur nga Prokuroria e Lartë për Krime të Luftës në Beograd, ka të bëjë me “organizimin dhe nxitjen e kryerjes së krimeve të luftës dhe gjenocidit”. Kjo akuzë bazohet në Nenin 145, paragrafi 2, në lidhje me Nenin 1 të Kodit Penal të ish-Republikës Federale të Jugosllavisë, raporton lajmishqip.
Pas konfirmimit të nisjes së procedurës penale, Zyra Ndërlidhëse e Republikës së Kosovës në Serbi ka njoftuar se do të dorëzojë një kërkesë zyrtare. Kërkesa do t’i drejtohet Departamentit për Krime të Luftës pranë Gjykatës së Lartë në Beograd, për të mundësuar një vizitë tek z. Halili në qendrën e paraburgimit ku ai po mbahet, raporton lajmishqip.
Në mbyllje të komunikatës së saj, Ministria e Punëve të Jashtme dhe Diasporës ka siguruar se do të ndjekë me vëmendje të shtuar rastin në fjalë dhe do të ofrojë informacione të vazhdueshme për opinionin publik lidhur me çdo zhvillim të ri, raporton lajmishqip.
