Ministri në detyrë i Mbrojtjes i Iranit deklaroi këtë të hënë se Republika Islamike është plotësisht e përgatitur për të përballuar “çdo skenar” të mundshëm gjeopolitik. Ai lëshoi një paralajmërim të prerë se çdo akt agresioni ndaj integritetit të vendit do të ndeshet me një “përgjigje të ashpër dhe vendimtare”, sipas deklaratave të transmetuara në televizionin shtetëror dhe të cituara nga CNN.
Në vijim të këtij njoftimi, Gjenerali Majid Ibn Reza bëri me dije se forcat e armatosura iraniane tashmë ndodhen zyrtarisht në gjendje të “gatishmërisë maksimale luftarake”. Ky mobilizim i shpejtë i trupave dhe makinerisë ushtarake vjen si një reagim i drejtpërdrejtë ndaj tensioneve në rritje në rajon, raporton Press TV.
Ky përshkallëzim i situatës pasoi deklaratën e Presidentit të SHBA-së, Donald Trump, i cili njoftoi se Marina amerikane do të nisë bllokimin e porteve iraniane. Uashingtoni synon të “ndalojë” çdo anije që ka paguar tarifa lundrimi ndaj Teheranit, një masë radikale që vjen menjëherë pas dështimit të bisedimeve diplomatike për paqe gjatë fundjavës.
Ndërkohë, Ministria e Mbrojtjes së Iranit ka siguruar opinionin publik se shteti disponon rezerva të konsiderueshme ushtarake për të përballuar një konflikt të zgjatur. Këto pretendime u pasqyruan nga “Young Journalists Club”, një medium gjysmëzyrtar me lidhje të ngushta me Gardën Revolucionare Islamike (IRGC).
Zëdhënësi i kësaj ministrie, Sardar Talaei-Nik, specifikoi se “rezervat strategjike” që përfshijnë arsenalin e raketave dhe dronëve, janë furnizuar në mënyrë adekuate përpara nisjes së mundshme të luftimeve. Ai theksoi se këto kapacitete janë në gjendje gatishmërie për të garantuar mbrojtjen e interesave kombëtare në çdo moment. /lajmishqip.net