Presidentja e Republikës, Vjosa Osmani, ka vendosur të presë verdiktin e Gjykatës Kushtetuese përpara se të hedhë nënshkrimin mbi dekretin që përcakton datën e zgjedhjeve të reja parlamentare.
Bekim Kupina, këshilltar për media në Presidencë, konfirmoi se ky qëndrim u është bërë i ditur subjekteve politike gjatë takimit konsultativ, proces ky që u bojkotua nga Lëvizja Vetëvendosje.
“E para e vendit ende nuk e ka zyrtarizuar datën e zgjedhjeve sepse, siç u komunikua edhe në takimin me partitë, ajo po pret lëvizjen e radhës nga Gjykata Kushtetuese. Në rast se ky autoritet vlerëson nevojën për masë të përkohshme, Presidenca do ta respektojë atë, duke sqaruar se një masë e tillë nuk e paragjykon absolutisht vendimin final mbi kushtetutshmërinë e dekretit”, deklaroi Kupina.
Ky veprim pason vendimin e Osmanit të së premtes për shpërndarjen e Kuvendit, pasi institucioni më i lartë legjislativ dështoi të përmbushte obligimin kushtetues për zgjedhjen e Presidentit të ri brenda afateve.
Ky dekret tashmë është atakuar në Kushtetuese nga Lëvizja Vetëvendosje, ku eksponentë të partisë së Albin Kurtit pretendojnë se Presidentja ka tejkaluar kompetencat dhe ka rrezikuar stabilitetin shoqëror.
Albulena Haxhiu nga ky subjekt politik e ka cilësuar aktin e Presidentes si një goditje direkte që synon minimin e rolit dhe punës së Kuvendit të Kosovës. ./lajmishqip.net