Liderja e partisë Guxo, Donika Gërvalla-Schwarz, ka shpërndarë një qëndrim zyrtar ku thekson se ishte njoftuar “përmes mediave dhe rrjeteve sociale” për largimin e Haxhi Avdylit, i cili u tërhoq si pasojë e asaj që ai e cilësoi si fushatë linçuese ndaj presidentes Vjosa Osmani.
Ajo bëri të ditur se subjekti që drejton e pranon këtë akt dhe e falënderon Avdylin për angazhimin e deritashëm, mirëpo insistoi se “asnjë pjesëtar i Guxo nuk ka marrë pjesë në debate denigruese apo sulme publike ndaj askujt, e aq më pak ndaj Presidentes së vendit”.
“Nga raportimet mediale dhe platformat sociale, kemi pranuar informacionin se deputeti Haxhi Avdyli ka ofruar sot dorëheqjen nga strukturat e Guxo. Kryesia e konsideron këtë vendim si një të drejtë legjitime dhe vullnetare të tijën. Njëkohësisht, në emër të strukturave tona, shprehim mirënjohje për bashkëpunimin dhe kontributin e tij brenda partisë. I dëshirojmë shëndet dhe mbarësi në të gjitha projektet e tij të ardhshme”, thuhet në reagimin e publikuar nga Gërvalla.
“Në fund, pas spekulimeve për arsyet e këtij largimi, sqarojmë se asnjë zyrtar i Guxo nuk është bërë pjesë e fushatave të ulëta apo linçimeve ndaj figurës së Presidentes. Subjekti Guxo mbetet i palëkundur në respektimin e ligjshmërisë dhe Kushtetutës në çdo rrethanë, duke përfshirë zhvillimet e fundit politike”, përfundon njoftimi zyrtar.
Gjatë kohëve të fundit, Presidentja Osmani u bë shënjestër e sulmeve të ashpra online pas vendimit për shpërndarjen e legjislaturës, ku pati edhe thirrje ekstreme për “pushkatim”, fakt që alarmoi Presidencën për të kërkuar reagim të menjëhershëm nga organet e ndjekjes.
Haxhi Avdyli, figurë e hershme në jetën parlamentare, u largua nga Guxo si formë revolte për të shmangur identifikimin me këtë valë agresive sulmesh, e cila sipas tij ishte bërë e padurueshme. ./lajmishqip.net