Zëdhënësi i Qeverisë së Kosovës, Arlind Manxhuka, ka reaguar pas pretendimeve të fundit të Ministrit për Komunitete dhe Kthim, Nenad Rashiq, lidhur me vendimin për regjistrimin e 24 hektarëve tokë në emër të Manastirit të Deçanit. Manxhuka theksoi se zbatimi i këtij aktgjykimi të Gjykatës Kushtetuese është bërë ekskluzivisht si kusht për procesin e anëtarësimit të Kosovës në Këshillin e Evropës.
Në përgjigjen e tij publike, Manxhuka sqaroi se ministri Rashiq ka “ngatërruar” rrethanat dhe ngjarjet. Sipas zëdhënësit, biseda ku pranohet kërkesa e Rashiqit lidhet me lejimin e vizitës së Patriarkut Porfirije në Kosovë gjatë Krishtlindjeve ortodokse të vitit 2023, e cila nuk ka asnjë ndërlidhje me çështjen e pronave të Manastirit.
Për të shmangur çdo keqkuptim, Manxhuka deklaroi përmes rrjetit social Facebook se zbatimi i vendimit kushtetues të vitit 2016 është komunikuar me transparencë të plotë. Lidhja e këtij kushti me anëtarësimin në Këshillin e Evropës për vitin 2024 është arsyetuar detajisht gjatë mbledhjeve të Qeverisë dhe në konferencat e atëhershme për media.
Ky reagim erdhi pas një interviste të dhënë nga ministri Nenad Rashiq për “Radio Gorazhdevcin”, ku ai pretendoi se ka pasur mospajtime të hapura me kryeministrin Albin Kurti. Ai nënvizoi se një prej vendimeve më kritike ka qenë pikërisht procesi i regjistrimit të këtyre tokave për Manastirin e Deçanit.
Kujtojmë se Qeveria e Kosovës i hapi rrugë këtij procesi me vendimin e datës 13 mars 2024. Vetëm pak ditë më vonë, Agjencia Kadastrale e Kosovës finalizoi regjistrimin e pronës në emër të institucionit fetar.
Beteja e gjatë ligjore mbi pronësinë e këtyre 24 hektarëve tokë dhe pyjeve përreth zë fill në vitin 2000, duke u përmbyllur përfundimisht në vitin 2016, kur Gjykata Kushtetuese vendosi në favor të Manastirit.
Pavarësisht këtij historiku ligjor dhe diplomatik, Rashiq deklaroi se kryeministri Kurti ia kishte bërë këtë vendim si “hatër” personal ndaj tij.
“Do ta them, ndoshta edhe pa modesti, por kjo ndodhi falë këmbënguljes sime. Kryeministri më telefonoi para mbledhjes së Qeverisë dhe më tha: ‘Kam menduar shumë për këtë. Do ta bëjmë, por ta dish – për shkak teje’”, ishte deklarata e Rashiqit, e cila tanimë është demantuar zyrtarisht nga ekzekutivi./lajmishqip.net
