Ministri për Kthim dhe Komunitete, Nenad Rashiq, ka dhënë një intervistë për Radio Gorazhdevac, ku ka analizuar zhvillimet e fundit politike në vend. Ai ka prezantuar një këndvështrim të ri, duke pretenduar se situata aktuale nuk lidhet me dështimin e procesit zgjedhor, por me përfundimin ligjor të mandatit të presidentes.
Sipas Rashiqit, mandati i Vjosa Osmanit ka skaduar tashmë, dhe për këtë arsye ai i është referuar asaj përgjatë gjithë kohës si “ish-presidente”. Ai argumenton se ky konstatim mbështetet në leximin që juristët i bëjnë Kushtetutës së Kosovës.
“Nuk do të thosha se zgjedhja e një presidenti të ri ka dështuar, por do të vlerësoja se mandati i presidentit të vjetër thjesht ka përfunduar. Ky është të paktën interpretimi i ekspertëve ligjorë kur bëhet fjalë për nenin 86 të Kushtetutës”, u shpreh Rashiq, përcjell Express.
Ministri ngriti dilema serioze nëse një person, të cilit i ka skaduar mandati zyrtar, gëzon ende autoritetin e nevojshëm për të ndërmarrë veprime radikale institucionale. Ai vuri në pikëpyetje legjitimitetin e vendimeve të fundit që vijnë nga Presidenca.
“Pyetja kryesore është nëse ish-presidentja Osmani ka të drejtë të shpërndajë Kuvendin në këto rrethana,” shtoi Rashiq. Ai shpjegoi se, sipas procedurës, pas skadimit të mandatit pason një periudhë 60-ditore për zgjedhjen e pasardhësit, pas së cilës shpërndarja e legjislaturës do të ishte automatike.
Në fund, Rashiq nënvizoi se i vetmi organ kompetent që mund të japë një verdikt përfundimtar mbi këtë ngërç është Gjykata Kushtetuese. Ai kërkoi që ky institucion të sqarojë nëse veprimet e ndërmarra janë në përputhje me aktin më të lartë juridik.
Sa i përket mundësisë së zgjedhjeve të parakohshme, ai konfirmoi se partia e tij është gati për garë. Megjithatë, ai pranoi se qytetarët ndjehen të lodhur nga proceset e shpeshta zgjedhore që po ndodhin në Kosovë kohët e fundit. /lajmishqip.net
