Njohësi i rrethanave politike, Agon Maliqi, ka reaguar ashpër ndaj situatës aktuale në vend, menjëherë pasi presidentja Vjosa Osmani bëri publik dekretin për shpërndarjen e Kuvendit të Kosovës.
Maliqi, teksa ka analizuar përplasjen mes afateve ligjore prej 30 dhe 60 ditësh, u shpreh skeptik mbi interpretimet e fundit. Ai theksoi se nuk e kupton se si fillimi i procesit 60-ditor mund të peshojë më shumë se afati specifik dhe i prerë për zgjedhjen e presidentit të ri.
Sipas tij, ekziston një rrezik real që Lëvizja Vetëvendosje po synon ta mbajë Presidencën peng përmes figurës së ushtruesit të detyrës, duke anashkaluar vazhdimësinë institucionale. Në reagimin e tij, Maliqi shkroi:
“Ndonëse nuk jam jurist, besoj se Gjykata Kushtetuese do ta sqarojë këtë mjegull. Megjithatë, është e pakuptueshme që afati specifik për zgjedhjen e presidentit të shkallëzohet pas procedurave të përgjithshme. Afatet kushtetuese ekzistojnë për një arsye madhore: sigurimin e vazhdimësisë së kreut të shtetit pa ndërprerje.
Me këtë logjikë të re procedurale, partia fituese – e cila kontrollon automatikisht kreun e Kuvendit – mund ta mbajë Presidencën të bllokuar me ushtrues detyre për një kohë të pacaktuar. Ky duket se është qëllimi i kësaj partie, e cila nuk ka ndërmend të ndalet pa vendosur nën kontroll të plotë çdo hallkë të shtetit, nga bashkësitë lokale e deri te institucionet më të larta”, përfundoi Maliqi. /lajmishqip.net