Ministri i Financave, Hekuran Murati, gjatë një paraqitjeje në emisionin “Pressing” në T7, ka dhënë sqarime të detajuara rreth çështjes së presidentit. Ai u pyet drejtpërdrejt se pse Lëvizja Vetëvendosje nuk e procedoi kandidaturën e Vjosa Osmanit për këtë post.
Murati u shpreh se presidentja Osmani në asnjë moment nuk është trajtuar si një kandidate konsensuale nga kampi opozitar. Sipas tij, opozita e ka cilësuar vazhdimisht atë thjesht si një kandidate të Vetëvendosjes, duke refuzuar bashkëpunimin.
Lidhur me qëndrimin e PDK-së, ministri rikujtoi deklaratat e Bedri Hamzës, i cili kishte bërë të ditur se kjo parti nuk do të qëndronte në sallë nëse zonja Osmani do të ishte kandidate. Ndërkaq, për kreun e LDK-së, Lumir Abdixhikun, Murati tha se ai nuk ishte shprehur asnjëherë qartësisht “për”, pavarësisht deklaratave se nuk ishin “kundër”.
Më tej, ai analizoi qëndrimin e LDK-së përmes seancës për amendamentet kushtetuese të dorëzuara nga presidentja. Murati pretendoi se pas mbështetjes fillestare të Abdixhikut, deputetët Hykmete Bajrami dhe Armend Zemaj kërkuan tërheqjen e tyre, duke shpërfaqur mospajtime brenda grupit.
Megjithatë, moderatori i emisionit, Leonard Kerquki, ka ndërhyrë duke demantuar këtë pretendim të ministrit. Kerquki theksoi se as Bajrami dhe as Zemaj nuk kanë deklaruar se nuk i mbështesin amendamentet, duke korrigjuar kështu interpretimin e Muratit gjatë transmetimit direkt. /lajmishqip.net