Zëdhënësi i Qeverisë së Kosovës, Arlind Manxhuka, ka reaguar zyrtarisht pas deklaratës së fortë nga Presidenca, e cila mohoi kategorikisht se Lëvizja Vetëvendosje (LVV) i ka ofruar mbështetje apo nënshkrimet e nevojshme presidentes Vjosa Osmani për një mandat të dytë.
Nga ana tjetër, shefja e stafit të presidentes, Learta Hollaj, i ka cilësuar pretendimet e LVV-së si të pavërteta. Përmes një postimi në Facebook, ajo theksoi se Presidentja Osmani demanton çdo ofertë për nënshkrime apo përkrahje nga kjo parti për rizgjedhjen e saj, duke e quajtur këtë situatë një “gënjeshtër”.
Menjëherë pas këtij denoncimi, Manxhuka u përgjigj përmes rrjeteve sociale, duke tentuar të ofrojë sqarime dhe duke shprehur një mbështetje të hapur për kandidaturën e Osmanit. Ai bëri një ftesë publike për shefen e zyrës së Presidentes që të verifikojë gatishmërinë e partisë në pushtet.
“Nëse ka dyshime se nuk i kemi premtuar Presidentes 30 nënshkrime, e ftoj që sonte të vijë në zyret e Lëvizjes, ku do t’i ketë edhe 3 më shumë se kandidati Glauk Konjufca, pra 33,” deklaroi Manxhuka në reagimin e tij.
Megjithatë, Hollaj nuk ka kursyer kritikat e ashpra ndaj mënyrës se si LVV po e trajton procesin e kandidaturës së Osmanit. Ajo e konsideroi si një veprim të turpshëm tendencën për të fajësuar opozitën për një dërgim të mundshëm të vendit në zgjedhje.
Sipas saj, propozimi i LVV-së ka qenë thjesht formal, duke e ftuar Osmanin të bëhej kundërkandidate e Konjufcës vetëm për numër. Hollaj akuzoi partinë në pushtet për manipulime, duke thënë se institucionet e shtetit nuk mund të trajtohen në atë formë.
Në aspektin ligjor, Kushtetuta e Kosovës parashikon që presidenti i ri duhet të zgjidhet 30 ditë para përfundimit të mandatit aktual. Në rrethanat e tanishme, ky afat përkon me datën 5 mars, pasi mandati i Vjosa Osmanit përfundon zyrtarisht më 4 prill.
Ekspertët vlerësojnë se mospërmbushja e këtij afati 30-ditor përbën shkelje kushtetuese. Megjithatë, për dallim nga skenarët e tjerë, ky dështim specifik nuk prodhon pasoja juridike të menjëhershme siç është shkuarja automatike në zgjedhje. /lajmishqip.net
