Presidentja Vjosa Osmani pritet të dalë në një konferencë të jashtëzakonshme për medie gjatë orëve të pasdites. Zyra e Presidencës ka konfirmuar njoftimin, duke bërë me dije se koha e saktë e këtij adresimi do të bëhet e ditur së shpejti.
Ky veprim vjen në vorbullën e zhvillimeve dramatike rreth procesit të zgjedhjes së kreut të ri të shtetit, pikërisht në ditën kur skadon afati ligjor për nisjen e procedurave për zgjedhjen e të parit apo të parës së Republikës.
Osmani mbeti jashtë listës së nominimeve të Lëvizjes Vetëvendosje, subjekt ky që befasoi skenën politike duke propozuar zyrtarisht Glauk Konjufcën për këtë pozitë kyçe shtetërore.
Një takim i realizuar ditë më parë mes Osmanit dhe kryeministrit Albin Kurti nuk arriti të prodhonte asnjë akordim konkret, duke e lënë situatën në një ngërç të thellë politik.
Gjatë seancës solemne të mbajtur sot në Kuvend për nder të Epopesë së UÇK-së, u vërejt qartë ftohtësia mes dy udhëheqësve, të cilët nuk shkëmbyen as përshëndetjen minimale mes vete.
Ky raport i tensionuar shënon një kthesë drastike nga viti 2021, kur dyshja Osmani-Kurti garoi në një bllok të unifikuar, bazuar në një marrëveshje paraprake për ndarjen e posteve kryesore.
Derisa opinioni publik priste rikonfirmimin e Osmanit për një mandat të dytë, shpallja e Konjufcës si kandidat i ri vulosi krisjen definitive të këtij partneriteti që dikur dukej i pathyeshëm.
Fronti i hapur mes tyre u konfirmua edhe mbrëmë, kur stafi i Presidencës dhe zyrtarë të Vetëvendosjes shkëmbyen replika të ashpra në distancë lidhur me sigurimin e votave të nevojshme parlamentare./lajmishqip.net
