Lideri i Lëvizjes Vetëvendosje, Albin Kurti, ka përmbyllur sot raundin e tretë të bisedimeve me kryetarin e LDK-së, Lumir Abdixhikun, në përpjekje për të gjetur një formulë për postin e Presidentit. Megjithatë, as ky bashkëbisedim nuk ka prodhuar ndonjë rezultat konkret që do t’i jepte fund ngërçit politik, ndërsa pas takimit, kryeministri Kurti u tregua mjaft i kursyer në detaje.
“Ende nuk kemi arritur te zgjidhja; në rast se do të ketë diçka të re, do t’ju njoftojmë me kohë”, deklaroi shkurtimisht Kurti para gazetarëve. Në anën tjetër, lideri i LDK-së, Lumir Abdixhiku, ka zgjedhur të mbajë heshtje të plotë, duke mos u prononcuar fare për medie lidhur me rrjedhën e bisedimeve të fundit.
Pavarësisht kësaj heshtjeje në nivel liderësh, deputetët e Lëvizjes Vetëvendosje kanë nisur sot një ofensivë të hapur verbale ndaj partive opozitare. Ata po i akuzojnë subjektet e tjera politike se po tentojnë ta sabotojnë qëllimisht procesin e zgjedhjes së kreut të shtetit për të nxitur një krizë të re institucionale.
Serinë e kritikave e hapi deputetja Arbëreshë Kryeziu-Hyseni, e cila përmes një reagimi publik, akuzoi opozitën për shantazh me qëllim të dëmtimit të figurës së kryeministrit. Ajo potencoi se pas fitores së madhe të dhjetorit, opozita po shfrytëzon nevojën për 80 vota për të bllokuar qeverisjen, duke e cilësuar këtë si një destruktivitet që dëmton direkt interesat e Kosovës.
Në të njëjtën linjë, deputeti Artan Abrashi ka drejtuar shigjetat e tij kah PDK-ja, duke vënë në pah atë që ai e quan mungesë parimesh dhe tendencë për bllokadë. Sipas Abrashit, kjo parti po përdor standarde të dyfishta lidhur me numrat në Kuvend, duke dëshmuar se qëllimi i tyre i vetëm mbetet bllokimi i shtetit dhe jo stabiliteti.
Tashmë të gjithë sytë janë kthyer nga e enjtja, 5 marsi, që shënon edhe datën e fundit ligjore për zgjedhjen e presidentit të ri. Nëse ky afat shkelet, Kosova rrezikon të futet në një territor të rrezikshëm kushtetues, ku rezultati i vetëm do të ishte shpërbërja e Kuvendit dhe shkuarja e pashmangshme drejt zgjedhjeve të reja./lajmishqip.net