Presidenti amerikan, Donald Trump, deklaroi në një intervistë të dhënë këtë të diel se 48 udhëheqës iranianë janë eliminuar gjatë operacioneve të vazhdueshme ushtarake të ShBA-së dhe Izraelit. Ai e cilësoi ecurinë e sulmeve si një proces që po zhvillohet me efikasitet dhe ritme të papreçedenta.
“Gjithçka po ecën përpara me shpejtësi të madhe. Kështu ka qenë për 47 vjet, por tani po shohim rezultate kulminante,” i tha Trump gazetares Jacqui Heinrich nga Fox News. Ai shtoi se suksesi i arritur është i paimagjinueshëm, duke theksuar se 48 zyrtarë të lartë u zhdukën përmes një goditjeje të vetme strategjike.
Ndërkaq, rrjeti mediatik CNN raportoi më herët se agjencitë e inteligjencës, përfshirë CIA-n dhe shërbimet izraelite, kishin monitoruar Ajatollahun Ali Khamenei për muaj të tërë. Ata vëzhguan me përpikëri lëvizjet e tij të përditshme dhe ato të elitës ushtarake e politike, duke pritur momentin kritik për të ndërhyrë.
Gjatë ditëve të fundit, u siguruan të dhëna se Khamenei dhe zyrtarë të tjerë të lartë të administratës do të mblidheshin të shtunën në mëngjes. Takimi u zhvillua në lokacione të ndara brenda një kompleksi në Teheran që strehon zyrat e Ajatollahut, presidencën dhe aparatin e sigurisë kombëtare. Ky grumbullim në një pikë të vetme e la udhëheqjen tërësisht të cenueshme ndaj sulmit të koordinuar ushtarak. /lajmishqip.net
