Kryeministri Albin Kurti ka deklaruar se Serbia, më qartë se kurrë më parë, e ka kuptuar faktin se Kosova është shtet sovran, pavarësisht se vazhdon të refuzojë aktin formal të njohjes.
Gjatë punimeve të Forumit Ekonomik Botëror në Davos të Zvicrës, Kurti ka potencuar se Rusia po vazhdon të kërcënojë stabilitetin e rajonit duke përdorur Serbinë si instrument të saj.
“Nga katër fqinjët tanë, tre na njohin. Vetëm Serbia reziston dhe nuk duket se do të ndryshojë qëndrim së shpejti, ndonëse besoj se ata e kuptojnë më mirë se çdo herë tjetër që ne jemi shtet. Realiteti në terren ka pësuar ndryshime rrënjësore. Megjithatë, ajo që duhet të ndodhë përfundimisht është shuarja e ëndrrës së tyre për rikthim, ashtu siç duhet të shuhet ambicia për Perandorinë Ruse. Moska nuk dëshiron fqinjësi, por nënshtrim, gjë që është tërësisht e pamundur,” ka thënë ai.
Duke u ndalur te situata në veriun e Kosovës, Kurti ka vënë në dukje se para një dekade nuk ekzistonte as liria minimale për të lëvizur apo për të komunikuar lirshëm në gjuhën shqipe.
Kurti ka shtuar se pikërisht ky agresion dikton nevojën për një solidaritet më të madh brenda kontinentit evropian dhe vetë aleancës së NATO-s. Sipas tij, synimi i Rusisë është shkatërrimi i të dyjave, ndërkohë që Kina synon të sfidojë fuqinë globale të SHBA-së.
Ai ka nënvizuar se çdo faktor që ndihmon fqinjin verior në përpjekjet për destabilizim, pashmangshëm i shkakton probleme direkte edhe Kosovës.
“Burimi kryesor i kërcënimit tonë në këtë drejtim mbetet Rusia,” ka rikonfirmuar Kurti para audiencës ndërkombëtare.
Sa u përket ndryshimeve të mëdha gjeopolitike, ai ka vlerësuar se bota po kalon nëpër turbulenca të cilat janë vështirë të parashikueshme.
Në fund, Kurti ka bërë thirrje për një bashkëpunim akoma më të ngushtë brenda strukturave të NATO-s, por edhe për fuqizimin e aleancave rajonale./lajmishqip.net