Projektligji i ri për mbrojtjen nga duhani parasheh rregullimin strikt të të gjitha produkteve të nikotinës, duke përfshirë cigaret klasike, ato elektronike me apo pa nikotinë, pajisjet me nxehje, produktet pa tym, si dhe ato që imitojnë aktin e pirjes së duhanit, bëhet e ditur nga Ministria e Shëndetësisë.
Sipas dikasterit qeveritar, synimi parësor është vënia nën kontroll e përdorimit të produkteve të gjeneratës së re, pasi ato gjenerojnë tym ose aerosol me substanca toksike dhe, bazuar në studimet e fundit, krijojnë varësi tejet shpejt.
Gjithashtu, MSH nënvizon se parashihet ndalimi i plotë i prodhimit, importit dhe tregtimit të produkteve me shije frutash, ëmbëlsirash, mentoli apo bimësh, të cilat konsiderohen si “mjete joshëse” që e lehtësojnë nisjen e duhanpirjes. Ky veprim rreshtohet krahas masave më rigoroze parandaluese që zbatohen aktualisht në vendet e Bashkimit Evropian.
“Fokusi ynë kryesor është mbrojtja e shëndetit të rinisë, duke parë se hulumtimet alarmante tregojnë se 9,0% e nxënësve të moshës 13-15 vjeç përdorin cigare elektronike, ndërsa mbi 10% i kanë provuar ato”, ka deklaruar ministri i Shëndetësisë, Azir Aliu.
Njëkohësisht, ky projektligj është i harmonizuar me politikat globale të shëndetit publik dhe udhëzimet e OBSH-së përmes Konventës Kornizë për Kontrollin e Duhanit. Ai instalon një sistem gjithëpërfshirës që bazohet në mbrojtjen nga tymi, kufizimin e marketingut, ndalimin e sponsorizimeve nga industria dhe ofrimin e mbështetjes për ata që dëshirojnë ta lënë duhanin./lajmishqip.net
