Drejtoria për Hetimin e Krimeve Ekonomike dhe Korrupsionit ka finalizuar sot një aksion të gjerë policor, të koordinuar me Prokurorinë Themelore dhe me autorizim të Gjykatës Themelore në Prishtinë.
Gjatë këtij operacioni goditës, hetuesit kanë bastisur katër lokacione strategjike, ku u përfshinë dy rezidenca private, një objekt biznesi si dhe një zyrë zyrtare.
Përmes zbatimit të masave të fshehta dhe speciale, hetimet kanë grumbulluar prova të pakontestueshme që vërtetojnë konsumimin e veprave penale: “keqpërdorim i pozitës zyrtar” dhe “marrje e ryshfetit në sektorin privat”.
Dosja hetimore zbardh se katër të dyshuarit – tre burra dhe një grua, të gjithë shtetas të Kosovës – kanë përfituar shuma parash nga qytetarët për t’i pajisur ata me certifikata për armëmbajtje, duke anashkaluar të gjitha kriteret dhe procedurat e rrepta ligjore.
Në cilësi të provave materiale, policia ka sekuestruar shtatë telefona celularë, dosje voluminoze dhe dokumentacion që dëshmon skemën korruptive, ndërsa të dyshuarit, pas intervistimit me avokatë, janë dërguar në mbajtje për 48 orë.
Ky intervenim dëshmon vendosmërinë e Policisë së Kosovës për të çrrënjosur korrupsionin në administratë dhe për të garantuar që pajisja me dokumente shtetërore të mos mbetet peng i ryshfetit./lajmishqip.net
